超高還原度!《哈利波特》傢俱、家飾品系列

無論過咗幾多年,《哈利波特》喺大家心目中都曾經係一個夢想,相信大家點都有幻想過自己會入讀霍格華茲,雖然呢樣係冇可能實現嘅事,但如果可以將自己屋企變成霍格華茲,大家又有冇興趣?

家具品牌 PBteen 推出全系列嘅哈利波特傢俱同家飾品,成個系列仲仔細到分埋4個學院,包括葛萊多分、史萊哲林、雷文克勞、赫夫帕夫,各有代表顏色同唔同嘅徽章圖紋、吉祥動物,如果你係某個學院嘅粉絲,大可以一套咁買,每日返到屋企見到充滿魔法一樣嘅佈置,壞心情急急走!

今次嘅傢俱系列,都以暗色調為主,大部分抱枕同蓋毯都以絲絨、短毛絨材質做成,配上木制嘅傢俱,望落就好似故事中嘅霍格華茲一樣,樸實中又有啲不平凡。

就嚟到冬天,大家可以考慮4大學院嘅針織蓋毯,大面積嘅包裹範圍令人感到無比溫暖。

小編最鍾意呢款金探子造型嘅時鐘,手工精巧,蓋子關閉時係一個簡單而吸睛嘅小擺設,打開時又可以睇下時間,美觀同實用性兼備~

呢啲好似書本一樣嘅其實係收納盒嚟,蓋起來嘅時候可以做小桌子,為家中點綴一下。

而呢幾款水杯就分別象徵住4個唔同嘅學院,配上各學院的旗幟,你哋又最鍾意邊一款?

而學習魔法必定唔可以缺少嘅貓頭鷹,就化身檯燈,晚上為你默默照明,依舊係一個好幫手呢!

圖片來源:PBteen