月球「墜落」大埔!$20任影 5米高發光兔、巨型水上月球燈

雖然天氣依然好熱,但其實又就到中秋節,難得有假期,大家準備好咩活動未?住嘅朋友,唔知有冇發現到嚟咗隻成5米高嘅巨型「兔仔」同巨型「月球」,原來就係為咗中秋節而舉行嘅活動,大家又多個地方打卡影相喇!

LENP白鷺湖互動中心將舉辦「燈賞月球Bunny and Moon」活動,只要$20就可以購買換領券同月球燈拍照(小編貼士:只要對場地專頁讚好及Tag 3位朋友,就有$10折扣),雖然只係影到剪影,但望落更有風格,最啱一班朋友一齊自創pose影相!

仔細睇盞月球燈,上面真係有月球表面坑紋嘅圖案,好精緻~

大家要留意返,因為月球燈放置喺水上,影相前要先着上救生衣行上浮板,影相時除低,每一次只可容納約10人登上浮板影相,所以記得乖乖哋排隊等候喇~

唔想俾錢?可以去埋側邊嘅草地,同一樣係5米高嘅巨兔影相,只要讚好場地專頁就可以免費同呢隻發光兔仔合照,不過留意返「發光兔」要到6時先會出現,大家唔想咁多人,可以趁天仲光嚟張相先,一樣咁得意~

除咗打卡影相,大家都可以喺果到12000呎湖畔草地上BBQ,每位$238(大小同價),亦設天台燒烤套餐,每位$198(大小同價),或者參加中秋限定DIY工作坊,親手製作「月兔燈籠」及「月兔投影燈」,收費$60/ 套票 (包括10分鐘充氣彈床+「月兔燈籠」或「月兔投影燈」),夠晒中秋氣氛!

LENP 燈賞月球 Bunny and Moon

日期:即日起至8/10(6-10pm)

地址:紅林路2號嘉里白鷺湖互動中心

免費來回穿梭巴士服務:墟站外上車 (5-10pm,每半小時一班。3-4/10將延長服務至10:30pm。)

BBQ預訂電話:2657 6013

 

圖片來源:kikoxx039、buujai @Instagram、Lake Egret Nature Park