advertisement

近期打開電視見到播梗劇集《超時空男臣》,都會特別留意一個小鮮肉,冇錯喇!就係飾演小太監—小冬嘅何廣沛(Matthew)。除咗後生靚仔,究竟仲有啲咩原因令佢大受歡迎呢?今次就同大家嚟一次大起底!

我諗各位觀眾對何廣沛嘅第一印象都會係《親親我好媽》中同江嘉敏(Kaman)飾演一對小情侶,親民嘅青春形象相當入屋,所以一出道已獲大台賞識,好快就獲力捧擔任重要角色,認真叻仔。

1988年出世嘅何廣沛,中學時就讀赤柱聖士提反書院,中三就全家移民到三藩市,跟住就喺美國加州州立大學(California State University)讀會計系,畢業後佢放棄做專業會計師,於網台擔任節目主持,之後再回流返香港做model,2012年加入了大台第26期的藝員訓練班,決心加入娛樂圈。

唔講唔知,原來28歲嘅何廣沛2014年差啲成為本地男團「天堂鳥」嘅成員,但大台希望佢專心拍劇,所以依家先可以晚晚喺電視機上見到佢。喺入行初期,何廣沛同一般演員一樣捱過唔少苦頭,以最低工資去接拍劇集,5年後終於有出頭天。

講返何廣沛曾經出演過嘅劇集,原來佢喺2014年已經喺《女人俱樂部》飾演吳啟華嘅年輕版, 2013年就在《超級無敵獎門人終極篇》做獎品先生。直到去年在《律政強人》中飾演方中信的徒弟阿Nick而開始為人熟悉,更憑此奪得無綫電視大獎2016的「TVB最佳新人獎」,星途先開始明亮。及後何廣沛再喺《財神駕到 》和《親親我好媽》中飾演配角擔任重要角色,大家都開始認得佢喇。

雖然何廣沛喺《超時空男臣》裡飾演嘅係溫婉嘅公公,但其實佢都可以飾演好man嘅角色,例如係剛拍完嘅《天命》入面做個正氣二品官,而拍攝中嘅《跳躍生命線》就做麻甩佬,角色咁百變,真係好期待佢之後嘅演技呀~

圖片來源:tvb劇照