馬上學起來!超強行李收納技巧

正值暑假旅行旺季,近排又咁多平機票,唔知大家下一站諗好去邊未?如果大家同小編一樣,諗住用盡行李箱嘅每一吋位置,就一定要記低以下執行李嘅「慳位攻略」喇,男女都啱用!

  1. 輕裝衣物

如果你打算輕裝出發,只要將衣物疊起,再捲埋一齊,就完成!

  1. 襪子

好多人去旅行都會帶多一對鞋,雖然鞋佔嘅位置比較多,但只要將襪子放進鞋裏,就可以慳多少少位。

  1. 皮帶

至於出外工公幹嘅朋友,可以將皮帶捲起,放進恤衫嘅衣領內,除咗慳位,仲可以防止恤衫領壓皺,一舉兩得。

  1. 剃鬚刀

剃鬚刀嘅刀片只要用文件夾夾實,就唔驚拎出嚟嘅時候整親手啦~

  1. 數據線

至於最容易打結嘅數據線,可以捲起放入眼鏡盒,可以同相機放埋一齊,容易搵之餘仲好整齊。

  1. 大量衣物

女仔去旅行點會剩係帶一套衫呢?面對呢一個情況,大家可以先將衣物疊起,再將衣袖向內疊,再包裹成一團,就可以慳返好多位。

  1. 化妝品

化妝品方面,好多時去短trip都冇需要帶整支過去,所以最啱就將適當嘅份量唧進隱形眼鏡盒內,再扭實,唔怕漏出嚟,呢招好實用!

  1. 內衣褲

而女仔嘅內衣褲好多時都唔知點收納,其實只要善用罩杯嘅空間,將內褲捲起放進罩杯,就可以慳返好多位,如果你會帶帽去,又可以捲起嘅內衣褲放埋入去,完美!

  1. 首飾

除咗數據線,另一樣最容易打結嘅就係首飾,呢個時候將唔同嘅首飾放平,再用保鮮紙捲起,就可以解決呢個問題~

最重要係返程時又慳返啲位放戰利品,所以大家記低mark低啦!

 

圖片來源:Styletc❤樂時尚

影片來源:抹茶美妝 @微博