advertisement
想當年人人討論嘅《尋秦記》，已經係16年前嘅事，古天樂飾演嘅項少龍小編到今時今日都仲記得，咁唔知大家又記唔記得同項少龍有過一段情嘅趙國公主倩兒呢？精緻嘅容貌令人印象深刻，估唔到近日佢又走返出嚟幕前，因乜原因令佢再次出現呢？
原來係因為「項少龍」同「倩兒」又再度合作喇。今次，古仔同雪兒齊齊拍新片《殺破狼‧貪狼》，戲中做一對真夫妻，仲有埋個女，終於「有情人終成眷屬」！
日前，二人接受訪問，講起二人相隔多年再度合作，雪兒就話：「好自然、好舒服，再做番幕前唔會唔慣，因為大家又熟，佢都冇咩改變，同以前一樣。」睇嚟二人雖然咁耐冇合作，但感情同默契依舊呀～
今年已經42歲嘅雪兒，已經過咗16年，樣貌都冇乜點變過，好似時間靜止咗一樣！
講起雪兒，原來除咗拍《尋秦記》，1999年又同葉偉信導演合作過《爆裂刑警》，仲有份拍攝《創世紀》而大受歡迎，之後赴台灣發展，2002年仲飾演過《流星花園2》中的第二女主角「葉莎」，2010年結婚後退出演戲生涯做幸福少奶奶，今次出返嚟拍戲，真係好期待！
（圖片取自網絡及截自劇照）
