【純粹講戲】《末日先鋒:戰甲飛車》:什麼叫創意?這就是了!

好耐沒試過,睇完一套荷里活動作片,不單止感覺好爽,仲覺得好有創意!

係,動作片仍然有創意!而且不是什麼新晉導演注入新力量,而係兩個加埋成百歲的阿伯,George Miller執導加John Seale掌鏡,將小小血腥、小小暴力、小小metal音樂,以及(竟然)新花款動作,拍成這部《Mad Max: Fury Road》。

我覺得中文譯名完全表達不到「Mad」同「Fury」的神髓,所以我堅持用原名稱呼這部戲。

基本上劇情簡單,正邪兩派要在一條公路上決鬥,然後搶番一個有水有食物的堡壘。動作片最緊要簡單直接,動作才重點。竟然想到用撐桿來打交,好多遠鏡見到演員彈下彈下,但同時張牙舞爪,我笑出聲之餘但又全身又好繃緊——我隔離的OL姐姐,中途細細聲話:「好緊張呀睇到好繃緊呀……」

話明公路打交,交通工具是另一亮點,土法製造的戰車有很多款,有刺猬、小甲蟲、越野……每架都有專屬司機,所以當你睇到中段,每架車都好似變成一個角色。戰車撞來撞去,還巧妙地利用車門來擋子彈,拍得差的話,可以是老土地「千鈞一髮」式避開,但導演選擇用金髮女神角色去做,你完全估唔到佢原來係動作位。

打交刺激都未夠,連美指都非常靚,每次爆炸都可以screen cap做wallpaper的構圖同色調,壞人角色用上Metal式黑白化妝——還生怕你嫌他hard core,每次打交都影一影個拎住噴火結他,狂炸機的結他手,加上十幾個大喇叭,令你以為聽到七彩LED燈貨車司機煲住碟經過。

我知,沒有提過演員和劇本嗎?Tom Hardy和Chalize Theron無錯是好型,亦好稱職,但因為這部電影好爽過癮,而且打鬥同重口味元素的平衡掌握得非常好,無論你hard core或平日好純情,都一定入到口。即使沒有任何「女人唔係物件」或者Tom Hardy——即係Mad Max的陰影,我都會比好高分。