有福爾摩斯Benedict Cumberbatch，又拎埋奧斯卡最佳改編劇本，加埋編劇 Graham Moore一句「Stay weird. Stay different」，已赢得口碑加共鳴。同史實不符、將圖靈寫成有亞氏保加症等等都唔重要。編劇導演只係借呢個人物，去表達想講的道理－－小人物在大時代，原來都可以影響世界。不過，明明講解碼，明明講小人物的偉業被遺忘，點解戲名叫「Imitation Game」？
原著叫「Alan Turing: An Enigma」，但導演同編劇就唔用。「Imitation Game」係圖靈提出的測試，戲中都有提到，就係用問答去區分人同機器，如果有機器可以通過測試，令人無法分辦佢係人定機器，就可以推論出機器有思考能力；如果直譯，就係「模仿遊戲」－－扮野。
當然，戲中不斷重覆的一句「不起眼的人會成就大事」係好出面咁，講咗導演對圖靈呢個故事的睇法，但從戲名「Imitation Game」或扮野遊戲黎睇，圖靈就係一個不斷模仿、扮演某種角色的人，由隱藏同性戀傾向，到要向同事示好、合作，隱藏佢不屑同埋唔願意埋堆的性格，甚至要保密解謎一事，扮冇參與過二戰，都係融入大眾的嘗試。
當然，模仿不太成功，令佢被藥物奄割，又感到非常痛苦－－呃到人，呃唔到自己。因為佢最終都好想得到人地嘅認同，而唔想好似Christopher無聲無息地離開咁，再次被遺棄。所以，當警察話，我冇辦法判斷你係咩人，圖靈唔係好欣賞佢嘅坦白，而係話，Then you're of no use to me. 劣評令佢痛苦，唔評論亦等於唔承認佢，佢只係想要被肯定。
再睇番一句「Stay weird. Stay different」，獨立特行當然有型－－但有型其實即係為人所接受、認可，咁又係咪真係好weird好different呢。
