advertisement
今年春節來得早，就快到年廿八，又到洗邋遢的日子。如果你平常好少做家務，相信呢個日子對你來說都是一件大工程！今次編輯就教大家一套德國人「無意識清掃法」，將打掃融入生活裡，就不用急急忙忙一日打掃咁辛苦！
大掃除之德國人「無意識清掃法」1︰房門統統打開
玄關同房間嘅門把上唔好掛任何東西，門口附近都唔好擺放櫥櫃或堆積雜物，門保持喺可以完全打開嘅狀態，令房間望落更寬敞整潔。即使外出唔喺屋企，房間嘅門都要維持半開，俾空氣流通，以免灰塵堆積。起床後，打開房門等空氣流通都好重要。
大掃除之德國人「無意識清掃法」2︰地板唔好放雜物
無論係鋪地毯定係木質地板，地上都盡量唔好放雜物，德國人就有呢個習慣，而且仲有「地板髒亂，就存不了錢」呢個講法，雖然冇科學根據，但少啲雜物，房間睇落清爽好多！
大掃除之德國人「無意識清掃法」3︰房間正中央唔好擺放大型家具
大型電視或桌子應該放喺房間嘅角落，先唔會令人有壓迫感，另外可以擺放散發柔和光線嘅燈具，或舒適嘅椅子、沙發等，親戚嚟拜年大家又可以一齊坐低下計、放鬆下。
大掃除之德國人「無意識清掃法」4︰一起床就開窗
早上一起身就打開房間窗戶，同時做個深呼吸，俾自己神清氣爽地展開美好嘅一天，新年新氣象嘛！
大掃除之德國人「無意識清掃法」5︰餐桌上保持清爽
好多人都會喺餐桌上擺放調味罐或茶具，幾乎佔據咗飯檯一半嘅空間，雖然方便，但看望落難免有紊亂嘅感覺。其實飯檯最好只擺放花瓶或一啲裝飾品就可以，將雜誌同報紙收起，桌上儘可能維持淨空，咁樣要擦去灰塵都容易好多！
