advertisement

小編不幸地確診新冠肺炎Omicron!知道自己中招時真係不知所措,好彩有男朋友同我一齊面對!知道好多人確診後都會感到徬徨無助,小編就分享自己的確診經過和康復心得,和大家一齊面對殺到埋身的疫情!

 

事源收到上個禮拜見過一面嘅好友通知,佢全家做快速測試驗出陽性反應!我即刻打電話畀男朋友,話佢知呢個大消息;同時立即通知公司及身邊親近嘅同事和朋友,請他們小心!由於我屋企有小嬰兒,所以立即決定轉移去男友家「避疫」,連夜開展了「我與男友朝夕相對抗疫行動」!

Day 1 發現確診了!

發現確診了,兩條線!

我同男朋友一齊在房內自我隔離,最初做快檢測都呈陰性,不過直到隔離四日後,一次快速測試中出現咗兩條線!雖然早幾日已感到有啲唔舒服,出現少少病徵,例如頭痛、肌肉痛等,但係我同男朋友都以為係小感冒(因為上星期食咗好多薯條、快餐、燒肉)。不過我哋都唔敢掉以輕心,最後發現確診都唔感到意外,立即通知公司同屋企人,就此開展漫長嘅抗疫行動!

 

Day 2 發燒、咳嗽 病徵開始嚴重!

男友幫我量度38.8度發燒。

今日起身就覺得身體四肢肌肉疼痛,成個人沉重重嘅感覺,手腳感到冰冷,但額頭就火燒咁熱!原來已經發燒,一量體溫,燒到38.8度,成個人軟晒,胃口全無!而同我一齊染疫嘅男朋友就恰恰相反,佢喺晚上感到全身發冷,此時我哋兩個簡直係「不同病,但相憐!」

 

Day 3 隔離生活

即棄餐具+愛心晚餐(超日常、零美感食物相)

隔離生活的確唔容易,加上我同男朋友都病到臥床不起,全靠男朋友屋企人照顧起居飲食,而染疫嘅我哋就留喺房入面,除咗去廁所之外都足不出門。我睇到喺網上有唔少人分享男女朋友之間其中一方檢疫令屋企人鬧矛盾嘅事情,本來都有啲擔心,但卻沒有發生喺我身上(因為男朋友家人真係好好)!

男朋友屋企人同我哋喺屋企都戴上口罩,防止同屋之下被感染,去過廁所之後都會噴清潔劑清潔,好彩屋企入邊有主廁、客廁,可以隔離使用!而即使係屋企,我哋都用即棄餐具食飯,防止洗碗時感染到家人。另一樣重要嘅事情就係通知大廈管理處,請佢哋特別處理我哋屋企嘅垃圾,防止大廈鄰居之間感染。雖然隔離生活好麻煩,但係我哋都盡量做好隔離措施,避免感染其他人

 

Day 4 病情慢慢好轉!

仲係兩條線!

距離第一日確診越來越遠,我哋嘅病情都慢慢好轉,我由發高燒變為只有晚上輕微低燒,而男朋友嘅抵抗力比較好,只有輕微頭痛同喉嚨痛症狀,病好嘅我哋慢慢恢復精力,亦都慢慢感受到隔離生活嘅沉悶,同埋要應付確診後嘅政府程序,我哋快速檢測初步陽性同埋已有病徵,唔可以排隊到社區中心檢測,因此請男朋友屋企人幫我哋交唾液檢測樣本,等收到衛生署SMS安排下一步隔離。(暫時到寫日記呢日都未收到SMS)

 

Day 5 隔離生活嘅娛樂

每日除咗跟進公司嘅工作、睇電話、食飯、去廁所,幾乎就冇其他嘢可以做。雖然成日希望同男朋友朝見口、晚見面,但係原來唔係咁容易,由有嘢講變到冇嘢講,男朋友又染上打機嘅「惡習」,冇嘢做嘅我就開始咗煲劇生活~

Netflix迷你影集《創造安娜》。

本來睇緊Netflix日劇《金魚妻》,但本來已經沉悶嘅抗疫生活加上日劇超慢嘅節奏,令我完全失去耐性,只係睇咗兩集半就棄咗劇,轉睇迷你影集《創造安娜》,緊湊節奏配上誇張劇情,超推介用來消磨時間!(編輯tone)

Day 6 未有政府安排點算好?

我嘅檢測結果仲係兩條線!

距離確診已經過咗六日,但係我同男朋友都未收到政府任何安排,雖然已經交咗唾液樣本,但係乜嘢消息都未有令我哋好難同公司交代,唔知幾時先當係真正確診同埋幾時先返得工,難道要等收到衛生署SMS,再等14日先可以完成隔離?咁樣差唔多隔離一個月,對生活影響都幾大㗎!

Day 7 男朋友已經好返!

男朋友嘅檢測結果!

確診一個星期,男朋友抵抗力比較好而且打咗兩針,佢已經完全好返啦,只係晚上有兩聲咳,在冇任何唔舒服。但係可能我冇打針嘅關係,身體仲未完全康復,依然有咳、喉嚨痛同肌肉痛,除咗keep住有食藥,仲有飲好多維他命C增強抵抗力,希望可以快啲好返!

 

Day 8 蘋果醋止咳

確診小編已經康復得七七八八,但係經常都仲不停乾咳,辛苦過氣管敏感,好多網民都表示自己即使康復後都好似我一樣不停咳。當我咳到每晚失眠嘅時候,男友媽媽就整咗杯蘋果醋我飲,竟然神奇地好快止咳,再冇氣管敏感嘅感覺!蘋果醋做法係準備一杯水,然後加入2湯匙蘋果醋和1湯匙蜂蜜,我飲嘅蘋果醋係男朋友媽咪自己整嘅,用蘋果、薑、糖、醋醃製 40多天而成,想快啲有得飲可以買市面上嘅蘋果醋,不過要留意蘋果醋濃縮程度!飲完喉嚨即刻感到舒緩,小編覺得超有效,大家都可以試吓!

 

Day 9 男朋友收到衛生署致電

男朋友今日收到衛生署致電,一開頭我哋勁驚要俾人捉去隔離,因為我哋都差唔多已經好返無緣無故去隔離可能會再被感染,亦聽過好多人表示竹篙灣隔離營或隔離酒店入咗去好難再出返嚟,所以我哋都覺得超驚!好彩衛生署淨係安排我哋居家隔離同派一啲物資俾我哋。

政府派嘅快速測試,棉棒勁大碌,成支筷子咁粗!

男朋友亦問清楚原來檢測結果陽性翌日計算第一日,好似男朋友咁接種咗兩劑新冠疫苗就可以只需隔離7日,但如果好似我咁未接種過疫苗就要隔離14日,直至檢測結果為陰性就可以結束隔離日子!

Day 10 終於收到政府SMS

等咗咁多日終於收到政府嘅確診SMS,男朋友仲要好返先收到!入面有條連結俾我哋去申報個人及屋企人資料,同日都收到政府寄來嘅檢測包,入面有確診之後應該點做嘅資料同埋大量快速檢測包,唔使再驚冇晒快速檢測用啦!

如果自己喺屋企快速檢測確診,可以唔使好似我咁交唾液樣本,只要喺網上登記確診就可以!

 

Day 11 終於一條線!

小編已經完全康復啦!

小編已經好返(雖然幾日前先收到確診SMS ),亦即將完成隔離,好快就可以出關!大家喺疫情時候最緊要Keep住身體健康,即使不幸中招都唔好慌,冷靜面對好快就會好返㗎啦!