advertisement
大家都一定有試過出街同人撞袋，如果想避免呢個情況發生，首先你要夠膽走喺潮流尖端，用一啲人哋未夠膽用嘅款式，例如係以下呢款「大肚腩腰包」，包你行出街秒成為全場焦點！
呢款由倫敦設計師Albert Pukies設計嘅「大肚腩腰包」（Dadbag），仿真度超高，做到好似衣服遮蓋唔到先會出現果四分之一肚腩，不多不少嘅完美比例真係幾可亂真！連表面嘅光澤度都有考慮到，小編真係佩服佩服～
除咗白雪雪嘅毛毛肚腩，仲有唔同膚色同款式嘅選擇，包括：毛量增加款、光滑款、黑肚臍款，仲有多重脂肪款，仲有一款啱你心水，考慮下做情侶裝都唔錯喎！
聽聞呢款腰包除咗搞笑，仲有一個好重要嘅額外功能，就係防盜喇！呢樣真呀，試問有邊個小偷會估到你將啲錢放喺個「肚腩」先？最危險嘅地方先係最安全嘅地方，真係要俾個like！
不過想買就要等多等喇，因為設計師Albert Pukies仲搵梗合作夥伴及製造商，期待佢快啲推出市面呀～
圖片來源：thedadbag
