advertisement

今次同大家講一樣女人嘅貼身嘢,就係子宮頸癌前病變。早前響Facebook Page(>>> 騎呢.weak7.卜車呔  Facebook)分享咗自己經歷,然後好多女網友PM我,講番自己狀況。之前都睇過好多資料,話呢個子宮頸癌前病變,愈來愈年輕化,估唔到真係咁多女人都有呢個病變,而佢地好多都仲未結婚生BB,廿零歲女仔都有,所以好想響度講下,希望提醒各位已有性行為嘅女士們,每年都要去做柏氏抹片檢查,保障自己嘅健康。

呔媽專欄236hpv患病經歷和治癒之路

簡單講番自己經歷,係於上年9月做婦科檢查,柏氏抹片報告顯示子宮頸細胞變異,屬CIN1子宮頸輕度癌前病變。由於抹片異常,醫生會再進行HPV檢查,結果陽性,再睇埋HPV類型係Type16/18,屬於高度至癌類別。而99%嘅子宮頸癌係由HPV Type 16/18引起,醫生擔心只做柏氏抹片會走漏眼,就安排我盡快做咗個陰道內窺鏡,進一步確認咗我只係CIN1。

癌前病變CIN有分1、2、3,然後先再真係開始變Cancer原位癌,所以CIN1 與2、3嘅治療方法係好唔同,CIN1只需於半年後再做抹片追蹤,而有60%嘅CIN1患者,係可以靠自己免疫力消除病變。至於CIN2、3嘅患者,就要盡快做手術切除病變部份,防止病變致癌。

呔媽專欄236hpv患病經歷和治癒之路

一開始發現病變時,個人都幾慌張的,好彩現今資訊發達,網上已有好多資料病例做參考,加上護士朋友解答問題,又原來同女朋友們傾開,有些一早已發現病變,大家都話只要定期檢查就不是問題,令我一顆徬徨的心得到安慰,在此特謝眾朋友!知道CIN1可以用自己免疫力消滅後,當然就係改變自己生活習慣,而早睡我認為係最重要!作為一個全職媽媽,再擠時間打理生意,平時真係早睡極有限,但身體出現問題了,為咗走更遠嘅路,係時候同自己講,真係要開始錫身喇!人就係咁,冇事冇幹,明知夜睡傷身都照捱夜,一有事呢,過去半年我好乖呀!哈哈,11點就睡,一有機會就休息,養豬咁,身體明顯好咗,連皮膚都好了,超開心!

 

 

半年過去,上星期又再做半年追蹤嘅抹片檢查,結果係子宮頸細胞正常,連HPV都呈陰性,全部正常番晒呀!原來CIN1真係可以靠自己免疫力痊癒的,當然有可能再變異,所以要一直保持身體強壯,心境愉快都係一個主因。咁我有問醫生,明明驗出我有HPV,點解又會變番陰性呢?佢話原來差唔多所有人一生中都會感染過HPV,但又會響一段時間內靠自己免疫力消除,一個人一生中可能會感染多次,如果唔係感染尖銳濕疣(椰菜花/菜花)果啲 HPV Type,HPV可以潛伏人體內10-20年都冇徵狀,你根本唔會知邊個惹畀你,或幾時感染過。

呔媽專欄236hpv患病經歷和治癒之路

有網友話因為HPV始終係由性接觸感染,講出黎就好似有性病咁,所以唔敢討論自己狀況,驚畀人覺得自己濫交。我又覺得呢樣嘢其實咁普遍,就算你從來只有你partner一個性伴侶,但如果佢同你一齊之前有拍過拖,都有可能係佢畀人惹咗,再感染你,咁唔代表你係個性濫交嘅人呀。當然如果明知大家會互相感染嘅,就保持一個性伴侶最安全啦,呢啲就算唔係性病,正常人都係需要保護自己,好好愛錫自己身體的。

 

女人們記得必須每年做柏氏抹片檢查,因為初期癌前病變係毫無徵兆,到會痛會出血時,可能已變Cancer!只有做柏氏抹片可一早發現病變,及時治療,大家都要提醒身邊女朋友定期做檢查呀!祝健康,平安。