advertisement

上集回顧 — 2000年2月,張敬軒(Hins Cheung)發表首支個人作品單曲《太遠》;同年同月,香港女性網站she.com成立,就這樣,他和她展開各自的20年。20年後的今日,他邀請「她們」(編輯和攝影師)來到百年大宅「The Old Alberose」,一起來趟「時光倒流二十年」的深情對話。

重溫 ->  張敬軒時光倒流20年(上集)︰音樂路上喜與悲

 

張敬軒時光倒流20年

說起張敬軒,大家多數會記起《笑忘書》、《櫻花樹下》、《酷愛》、《俏郎君》幾首熱門經典歌,同時,亦令人聯想到他的餐廳和婚紗店。是的,張敬軒近年創業做老闆很成功,有人認為這都跟他曾修讀會計和商業管理有關,對於此,他表示︰「我覺得我唔係一個識得做生意的人,不過我的職業帶來便利俾我去認識好多做生意叻的人。直至經營婚紗店我就精明了,我主力做我擅長的事,就是找歷史、brand history等,其他方面就跟partner分工合作。」軒爺很謙虛!

他繼續說︰「其實係幾大的考驗,細個學的東西入面﹐我讀的是銀行會計,以慳錢為主,樣樣都要慳,但呢個又同我的自己性格大相逕庭,所以就冇乜幫助。不過,的確在呢幾年入面,大家見到我好似做了好多不同的事,但其實我都交了很多學費。」

張敬軒居住過的大宅都很美

歷史事物的情意結

張敬軒居住過的大宅都很美,尤其是這次的訪問拍攝地點百年大宅Alberose,而他的生意亦跟跟文化保育有關,為何如此喜歡歷史事物?他表示︰「情意結呢啲好難講的,雖然細個我住在政府公務員宿舍長大,但係我們住那區,我屋企隔離全部都係呢啲歐式建築,當時係殖民地時期,一些外籍人士或華僑來起樓,雖然自己住唔起,但成日都會入去玩,所以好熟悉內裡的格局。直至來到香港慢慢安頓好之後,覺得可以改善自己住的地方,希望佢不單是一個屋企,亦係一個有其他意義的地方。甚至乎可以同我自己興趣有關的,譬如我鍾意歷史,鍾意古古舊舊的家俬,這些在新樓入面唔係唔可以擺,但好難,因為擺完之後跟住有個鋁窗,真係好難相配,所以我就覺得不如搵舊樓住。

當編輯走進Alberose,立即被各式各樣的懷舊家俬吸引住,心裡亦不禁聯想起價錢。「其實好多人睇訪問都話間屋好靚,好似廠景咁好誇張,但其實這裡有好多東西都好平,譬如我坐著的這對梳化,只需6千蚊,現時無論係I字頭又或F字頭那兩間家俬店,呢個價錢可以買到咩?」編輯亦忍不住立即試坐這對梳化,手工精細、質料很美之餘,亦坐得很舒適,超值!

Alberose屬於香港大學的二級歷史建築

百年大宅的日常

Alberose屬於香港大學的二級歷史建築,這裡地方很大,軒爺最常停留在哪裡呢?「這個客廳部分我通常會同朋友或者客人留在這傾偈﹐而我自己最經常停留的就係外面有露台的verandah,因為那裡可以飽覽港島南邊的海景;而且日間有好充足的陽光,好舒服,我好鍾意留在那裡。」軒爺亦表示往日住在這裡時,他習慣起床後便到verandah梳洗和吃早餐,享受陽光和海景,好chill呀!

 

20年間音樂事業演變

對於入行20年,軒爺亦有一番感受,他說︰「我分咗好多個階段,在我頭十年入面,我會將這十年分為一半一半,頭五年係我創作力最旺盛的時候,我唱別人寫的歌hit過自己的歌。對於唱片公司來說,我這些所謂藝術家又奄尖聲悶,我做一首歌的時間在商業操作下其實已經可以錄到4、5首歌,甚至乎好多時候唱片公司唔會等你的deadline;久而久之,慢慢我自己就寫少了歌,只維持一定數量。去到後半段時候,因為自己積壓了一些情緒,又開始覺得有一種『我都係想唱返自己寫嘅作品』的感覺,咁就迫自己去到一個樽頸位,唔知點,唔知行定唔行又或點行?」

張敬軒從小已熱愛音樂,加入樂壇自然是理想的職業

相信每個人在事業路上都會遇到一些挫折,幸好時間和心態可以戰勝一切,對於張敬軒來說亦然。「直到十年之後開始自己寫返歌,又轉了新公司轉了新環境,咁又係下一個階段。再五年之後,因為一些經歷和想法的轉變,突然覺得呢份工好似唔係好穩陣,不如嘗試做下其他嘢,咁就去做餐廳了。過程中還有錄音室,不過由始至終我都唔覺得這是副業,因為我本身就在音樂行業。至於The Crown又或者婚紗店,其實都是類似的概念,就是想去學多少少嘢,讓自己作為在社會打滾的一份子。」

最愛的仍是音樂 作為一位歌手,張敬軒從小已熱愛音樂,加入樂壇自然是理想的職業;所以,無論過程中他遇到樽頸位,又或是曾經退縮過,最終他仍是選擇與音樂同行。「近件嘗試過其他發展,咁但係做完之後,或者在做的過程之中﹐我都覺得自己想做返歌手、做返音樂。因為我好怕面對人,今日呢度已經係我極限。」沒想到軒爺會有「人群恐懼症」。他解釋︰「講你都唔信,我每次出席頒獎典禮記者會,見到好多藝人、高層和傳媒朋友,我就覺得唔係好自在,我會緊張、會手心冒汗。咁所以我覺得像我這樣有人群恐懼症的人,其實最舒服的狀態都是留在錄音室﹐關好門自己一個做自己的事。所以,就當之前20年是為想放心和舒服做自己想做的事打好基礎;今年開始,大家都見到我好主力在音樂上發展,因為呢個始終是我自己最喜歡的事。」

想聽更多關於張敬軒的20年,可以click入影片觀看。

 

COORDINATION : Joey Chen

VIDEOGRAPHER : Keith Au、Johnny Yau、Jackie Chan

EDITING : Gloria Woo

VENUE︰The Old Alberose

Special Thanks to Sennet Freres