advertisement

由陳貝兒Janis主持的人氣真人show節目《嫁到這世界邊端3》近日開播,製作團隊繼續尋訪嫁到世界邊端的香港人妻。今輯的第一個故事的主角是非洲人安Serena,單是聽到嫁去非洲尼日利亞,相信已經嚇怕不少港女。Janis亦佩服Serena勇氣,大讚她︰「愛與安全之間,她選擇了愛。」是的,尼日利亞的確不安全,Janis與團隊連日來的拍攝都要軍裝警察陪同,而且當地的衛生問題極度嚴竣,旅程真係夠晒驚心動魄。

非洲人妻的故事源於港女Serena在香港認識尼日利亞人Sean,繼而墜入愛河,結婚後生了一對子女。眼見Sean在香港因種族歧視,去年決定帶同子女搬往丈夫的家鄉尼日利亞。他們定居於尼日利亞的城市拉各斯,當地基本生活條件真的麻麻,隨時斷電斷水,而且尼日利亞經歷長期內戰動蕩,治安差,部落之間至今仍不時衝突流血。當地貧富極度懸殊,打劫、綁架及殺人的案件不時發生。

A post shared by (@) on

面對治安差的恐懼

最令Janis難忘的是抵達尼日利亞落機當日,Serena安排兩位軍裝警察陪伴更說當日佢哋條村發生了一單四屍慘案,仲係斬件上,好得人驚。另外,探訪時禁忌很多,她更透露最驚險一次是晚上行車時,在馬路上發現有一架車撞了圍欄:「原來呢個時候千祈唔好落車,好可能一落車就有人打劫。仲有連爆軚都唔可以落車整,因為可能係賊人專登放啲刺去整爆啲車軚,只要有人一落車就會打劫,好彩我哋當時有兩位警察保護。」

A post shared by (@) on

究竟Serena如何面對治安差的問題?Serena表示:「其實呢度嘅治安冇想像中咁差,只係一隊中國人喺街度拍嘢會好招搖,為咗大家嘅安全同拍攝順利,先安排警察保護。現在我都可以自己出街,如果老公唔得閒車我,就Call Uber或者叫朋友來接我。但前提係有一啲地區我係唔會一個人去,八點後亦都唔會周街走。」


面對衛生問題

尼日利亞的自來水都是黃色的,Janis表示每次用水喉水沖完涼,最後都需要用蒸餾水沖身一次。而且當地的廁所衛生狀況十分差,Janis更試過突然肚痛搵唔到廁所的情況,她說︰「有次需要坐6個鐘頭的車去Sean的家鄉,中途冇可能唔去廁所,但當地真係好污糟,離遠已經聞到好臭,但又必須要去,當時真係好想搵個膠樽就地解決,情況真係好狼狽!」


面對非洲大男人

一向習慣平權的港女如何面對非洲民族的大男人主義,妻子在親友面前,必須稱呼自己丈夫為「皇上」、「主人」,Serena在節目中表示曾一度想過離婚,她說:「我哋一齊初期係好火星撞地球,佢覺得自己天生就係皇帝,會話呢個係我決定,你聽就得,唔洗講嘢。非洲人嗰種大男人唔係一般嘅大男人,嗌交嘅時候真係咩都講得出,傷盡你心嘅說話都講得出口。」

不過她亦透露其Sean亦有溫柔一面:「我哋未結婚之前,周末佢會上嚟我屋企,煮早餐比我食同幫我燙好跟住一星期返工要着嘅衫。結婚之後,佢見到我頭頂有白頭髮,會去買染發劑幫我染髮。喺日常生活小事照顧我嘅,先係可以過人世嘅男人。」

看著Serena與Sean的異國戀,Janis既佩服又感動︰「我好肯定Serena一定很愛這個男人,因為她不是移居到一個更舒服的地區,而是一個比香港環境更差的地區。佢揀咗愛情,為呢個男人甘心嫁到咁遠!有時我哋女人為咗愛情就會好傻,如果我遇到Mr. Right,我亦甘願跟隨佢嫁去世界邊端!」

 

PHOTO : Tat Hui

MAKEUP︰Sammy Lam

HAIR︰Keith Wong & Alex Siu @Orient4

WARDROBE FOR JANIS︰Oplus2 (O+²)