你一定見過佢哋！原來大小姐都係港姐出身

今屆香港小姐啱啱選完，除咗冠亞季軍，Honey 何泳芍、工藤佑采等落選嘅港姐一樣引起話題。唔講唔知，如今喺電視上都經常見到以下幾位嘅出現，但你又記唔記得佢哋原來都係港姐出身？

1. 林淑敏

憑住劇集「愛回家」裡面出色嘅演技，而為人所熟知嘅「大小姐」林淑敏， 原來喺2000年因參加香港小姐競選而入行，並獲得「網上最奪目小姐」獎項！大家剩係知佢叫「大小姐」，有冇人記得佢都係港姐入行？

林淑敏喺2002年起參演無綫電視的劇集，早期只係擔當唔起眼嘅配角，例如妓女、女友、情婦、二奶等，直到2017年起，喺《愛·回家之開心速遞》中飾演「大小姐」龍力蓮一角，將野蠻潑辣，卻又對愛情有憧憬嘅角色性格發揮得淋漓盡致，得到網民勁讚，人氣急升！特別係同「送水輝」嘅愛情線深得觀眾、網民嘅喜愛～小編都好期待睇更多佢哋嘅感情線呀！

2. 簡慕華

大家成日喺劇集見到嘅簡慕華，原來都係2000年參加香港小姐競選，同「大小姐」係同一屆港姐！

起初簡慕華同樣擔任咗唔少閒角，直至2007年，喺《同事三分親》飾演Doris一角而為人熟悉，之後幾年憑《心戰》、《金枝慾孽貳》、《師奶MADAM》中擔任嘅角色，三度入圍《萬千星輝頒獎典》嘅「最佳女配角」，演技得到觀眾認同！

不過去到上年，簡慕華拍完《超時空男臣》後與無綫電視解約，最後一部播出嘅劇集係《翻生武林》，睇嚟以後都冇乜機會喺電視上見到佢，原來係因為上年已經嫁咗人，做咗幸福少奶奶喇～

3. 葉凱茵

相信大家對葉凱茵個樣都唔陌生，但就未必記得佢個名，其實佢喺2002年參選過香港小姐，雖然都係以閒角同配角爲主，但觀眾們對佢都好有印象！

另一樣令人特別記得嘅係，葉凱茵喺2004年曾經同李思捷拍過5年拖之後分手，直至 2009年，同圈外商拉埋天，依家已經有小朋友喇～

4. 吳幸美

講到吳幸美，大家都一定知邊個！之前喺節目《東張西望》上試飲「斷片酒」令佢街知巷聞，原來佢都喺2003年參選香港小姐先入行，之後喺《東張西望》擔任其中一位固定節目主持、記者。

吳幸美初入行時，長相被唔少觀眾同網民認為貌似吳美珩，兩人姓名又極其相似～其實仔細睇，吳幸美五官都幾精緻，期待佢之後喺演藝圈有更多嘅發展呀！