- entertainment
- by sue wai
- 2023-05-08
2023年度CHILL CLUB推介榜年度推介22/23 昨晚舉行，MIRROR三子囊括「年度男歌手」金、銀、銅獎，分別由Anson Lo盧𤃬霆、姜濤，以及Ian陳卓賢奪得。當中姜濤更很有心思地對MIRROR 11子逐一致謝；而Anson Lo以160826票成為「票王」奪得金獎，他更抒發感言指12子永遠一條心：「我哋永遠都係MIRROR！」
MIRROR三子囊括「年度男歌手」金、銀、銅獎。
姜濤對11子逐一致謝 壓軸對Anson Lo講 I Love You
Ian 陳卓賢得獎時只簡單多謝 MIRROR，到宣佈姜濤得銀獎時，他起初逐一感謝公司高層及MIRROR每一位隊員：
Lokman「我記得頭幾年我地內部有好多問題，大家睇《調教你MIRROR》就知道，但係我知道，經過《調教你MIRROR》之後，你有好努力成為一個好嘅隊長，我好respect你！多謝你！」
Tiger「雖然《調教你MIRROR》入面話要同你每日講50句嘢，但都係一句都無，但係我知道你喺電影方面、唱歌方面都好有talent，所以繼續加油！」
Jeremy「你係我最surprise嘅一個人，老實講我喺《全民造星》嗰陣並冇太多留意你（笑），講真你係… 我覺得我地咁多個成員當中，真係進步得最多最多嘅一位！」
Alton「我每一次搵你都係傾無聊嘢，但我知道你一直好渴求有表現自己嘅機會，我相信你總有一日一定會做到！」
Frankie「其實我同Tiger起碼有一句，可能我同你一句都冇（笑），但係我知道你仲好努力搵自己嘅目標，我相信你喺比《調教你MIRROR》嗰陣更清楚自己嘅目標，所以，加油！」
Anson Kong「雖然脾氣都係照舊啦，但係呢，我知道你都好努力咁成為我地嘅副隊長，所以好尊重你，哈哈！」
Ian「I Love You！我proud of你值得擁有嘅一切，你攞獎我好開心，哈哈！」
Stanley「我知道你好想成為一個演員，我知道你對演戲嘅熱誠比起在場每一位都更加多，所以你一定會成為一個好好嘅演員。」
Jer「我知道你好想做到自己嘅音樂路，我知道你一直對自己嘅音樂好有堅持，繼續堅持落去，因為我都係一個咁樣嘅人！」
Edan「你實在係一個非常全能努力嘅人，我只可以講… MIRROR入面我第二佩服你！」
當他壓軸提到Anson Lo時，指Anson Lo是他「第一個最佩服的人」，又主動提起支持者之間的爭拗：「其實我知道外界成日都會將我地攞去比較，我知道我地嘅支持者有時會有好多爭拗，但係我從來都無理過呢啲嘢，我真心地… 喺《全民造星》第一日開始，我地經歷過好多誤會，但係我永遠都係最信你，你知㗎！所以… I Love You！」
Anson Lo蟬聯「年度男歌手」金獎表白MIRROR永遠一條心
「年度男歌手」金獎由Anson Lo盧瀚霆奪得，他得感謝一眾神徒，提及家人更一度哽咽，而他亦就姜濤所講就支持者的爭拗與外界的比較作出即時回應：「啱啱姜濤講嘅外界紛爭同比較，我哋係無辦法stop任何嘢。但冇嘢阻檔我哋12個一齊嘅力量，每一位想分化我哋嘅人，我會繼續用表演同佢哋講，我哋永遠都係MIRROR！」
Anson Lo分別奪得「ChillClub年度男歌手金獎」、以及憑《永順街39號》奪得「ChillClub年度流行歌曲獎」。
姜濤教主感人表白姜糖神徒大和解
過去姜糖與神徒各自支持偶像之餘，偶有「走火」擦出火藥味（昔日文章：姜濤表演完畢姜糖疑不滿非壓軸即拉大隊走人！網民批粉絲行為無品：全港最大型0尊現場 ），今次CHILL CLUB 頒獎禮二人互相示愛表白心跡，各自的支持者都非常受落，有姜糖表示：「欣賞佢同AL出黎直接 Stop D Fans唔好內鬥，Good Job 👍🏻」、「姜濤好善良，好真摯，真心喜歡自己的隊友」、「好感動，睇到喊左，大家都知道冇嘢可以分化你 (姜濤) 同教主嘅感情」，又有姜糖猜測姜濤的致謝是令每位兄弟都能夠在鏡頭下曝光：「他的感言令到每位隊友都有一定的鏡頭」；而亦有神徒感謝姜濤為彼此的支持者說話：「今天偶像說的話很感動教主和姜濤,都希望你們互相有愛😊」，又有神徒感嘆教主經常被抹黑仍然堅持努力，得獎實置名歸：「Anson Lo出道以來不斷被抹黑，無理攻擊，紛爭不斷，但佢依然努力向前，真係好值得支持。」
MIRROR出道 4 年多，雖然中間曾經歷低潮，今次頒獎禮全團亮相出盡渾身解數的演出，證明了他們再次站穩陣腳，令人期待他們未來為支持者帶來更精彩的演出。
《CHILL CLUB 推介榜年度推介 22/23》MIRROR首度現場公演英語作品《RUMOURS》
