梁詠琪演唱會被批｜ 陳慧琳楊千嬅都中槍？網民狂踩楊千嬅：冇料到！梁文禮開咪致歉：其實向梁詠琪示愛

梁詠琪（Gigi）一連三場紅館個唱於周日完成尾場，今次演唱會有不少圈中好友支持，亦請得鄭秀文（Sammi）等歌手作嘉賓，於社交網絡上好評如潮。可是商台DJ梁文禮於首場欣賞完梁詠琪演出後，在社交平台明讚暗踩惹起爭議；然而梁詠琪完騷後以高EQ回應被炒熱：「我承認有好大進步空間喺各方面」，亦引起網民於連登討論區發帖文討論，連帶同期女歌手陳慧琳楊千嬅也中槍，不過綜合留言楊千嬅獲最多負評：「冇料到，但食正黃金時代就上到位」！梁文禮最終不敵外界批評，終在今午（20/2）公開致歉及為事件解話。

梁詠琪被網民鬧爆是「雙面人」的梁文禮，剛剛透過主持商台節目《叱咤樂壇》解話，「我想對團隊、對梁詠琪講句唔好意思，第一日睇完好肉緊喺自己平台寫咗應該點做，有少少意見，之後傳媒話狠批，希望大家接受，一個演唱會有好多面向，觀眾有自己選取。如果之後演唱會會出DVD我都想睇多次，我接收好多樂迷的說話，問係咪睇唔到啲乜，可能我座位角度有啲嘢睇唔到，想欣賞多次。」

梁詠琪高EQ回應批評：不緊要的

昨晚完騷後Gigi大方回應指每件作品都有人喜歡與不喜歡，「不緊要的，我都承認自己在各方面都有好大進步空間，今次盡了最大努力未必符合到每個人期望，不過不緊要的，我會繼續做，還有進步的時間。希望大家給予時間我進步，繼續做好一點。」，獲網民大讚EQ高。

批評一出，有人在連登討論區發帖文討論掀起熱議，梁詠琪獲得大批網民讚賞和平反。「咁佢當年真係靚嘅，仲有個樣同腳」、「係好靚，好清新嘅氣質。青春可人咁。」、「但gigi係真心靚女wor，當年夠青春，又靚、又有k歌，唔紅都難」；也有網民認同梁文禮評論，「抹完鼻血嘅紙巾，好X貼切」。

陳慧琳楊千嬅備受繫連

除了談及梁詠琪，同時繫連兩位當年差不多同期出道的女歌手陳慧琳和楊千嬅，被連登網民批評樣貌和唱功等。談及陳慧琳時，沒有太過激烈，有人指「公認靚」，卻有指「三白眼」，與梁詠琪一樣擁有完美身形，舞功了得，卻有指「只係把聲煩膠姐」。不知道陳慧琳何時再在紅館開騷證明自己呢？

反觀楊千嬅獲得連登網民一面倒負評，「咪拎兩個（指楊千嬅與梁詠琪）嚟比啦，梁詠琪有樣有腳有台型叫睇得下，另外嗰個有咩嘢，佢就真係死付碌啦」。

楊千嬅獲負評：「明顯再低一個級別，樣同實力都無」

或許是去年演唱會，在一片爭議性中完成，令人印象較深刻。先說售票、入場都引起外界關注，在演唱會時，有指「第一首頭30秒已經走咗音」，再次被外界質疑她的唱功；雖然楊千嬅在演唱會中多次爆喊演出，但都未能挽回民心。不少網民在連登討論區留言表示楊千嬅歌技依然毫無進步，甚至比以前更加差；又有網民嘲笑楊千嬅全身紫色的長裙服裝似矮瓜。而就梁詠琪事件中，楊千嬅也中槍，有連登網民指：「楊千嬋明顯再低一個級別，樣同實力都無，Gigi 起碼叫靚靚地啊」，看來不被網民討好。