網絡熱話｜網民爆料見明星真人經歷　MIRROR 4子呢位最有星味！張曼玉親民又低調 關之琳皮膚超好！

有說藝人在人前人後一個樣，未見過真人都難以分辨。過往已被公認為最「冇架子」藝人有任達華、周潤發及劉德華。不過，近日有網民討論區發文問「大家見過邊位明星真人」，隨即引來不少網民踴躍回答，好多都有讚冇彈，其中有人見過MIRROR 4子，當中有姜濤，大讚Lokman最似明星，而影后張曼玉親民又低調，還稱讚關之琳及陳冠希顏值高！

近日有網友於連登討論區發文問「大家見過邊位明星真人」，不少網友均踴躍回答。有人隨即留言讚羅蘭及魯振順好友善。「大約8至10年前係某商場見過羅蘭姐派月餅（應該係幫某月餅做宣傳）個樣好慈祥。6至7年前係上水街市樓下的士站果頭見過魯震（振）迅（順），好大聲嗌佢全名佢擰轉頭揮手同我say hi，真人好高大。」

影后張曼玉親民又低調

有位疑似是行內人的網民爆料，大讚影后張曼玉親民又低調，「夾過好多明星做嘢，如果講最有記憶點應該係張曼玉，真人完全無架子，又無大排場，自己孭個背囊仔嚟，落手落腳做嘢，大明星就係大明星」。

MIRROR 4子各有特色！

至於，人氣男團MIRROR去到邊都被粉絲包圍，其中點評以下4子：最常見的當然是姜濤，經常不避忌到維園街場打波，以全身黑色打扮，極為低調。有人讚Lokman好型「最似明星」；Tiger比想象中高；而Alton則有人話佢路人feel，又有人讚「真人勁靚仔」，看來反應都算正面。

關之琳獲讚皮膚超好！

過往被指真人外貌好sharp，如郭富城、蔡少芬、魏浚笙、馬詩慧和女兒，有人指在機場見過「大美人」關之琳，特別稱讚她「帶黑超但皮膚超好」；另外也有人讚陳冠希真人比上鏡靚仔，「唔知點解佢比人影啲相又殘又唔掂」。

另外，獲得好評的藝人包括周潤發、劉德華、張家輝、陳奕迅、鄭伊健及馮允謙等，「張家輝，掃毒上果（嗰）期見到，合埋照，真人nice」、「深宵閃避球謝票場見到鄭伊健，真人好型好Nice」、「係街見到馮允謙，超friendly，會同你say hi」、「發哥，超平民搭地鐵，打招呼有應我，好nice」、「劉德華，同佢有眼神交流佢會主動打招呼」。