【反起跑線聯盟】強尼做ViuTV一哥再升呢挑戰男主角 親解藝名出處 MIRROR中最欣賞是誰？

ViuTV由梁詠琪、周家怡、潘燦良、強尼主演新劇《反起跑線聯盟》即將於星期一播映，當中有ViuTV一哥之稱的全能藝人強尼（原名許博文Johnny Hui）擔正做男主角。昨日他接受陳志雲個人頻道《Stephen．傾》專訪暢談入行經過，親自拆解「強尼」這個名字的出處。

本名許博文「強尼」藝名來自劉青雲

強尼見有線電視球彩台請素人擔任主持，膽粗粗應徵：「收到通知第二日就返工，導演問大家叫乜名，身邊有一個同事叫阿明，我自己叫阿文。但心諗，阿文會唔會太普通？呢個名有可能長期用喎。剛好睇過一套電影叫《絕世好Bra》，戲入面劉青雲的角色叫強尼，英文名同我一樣叫Johnny，所以就用咗強尼呢個名，用到而家。」

強尼30歲思考人生：一份冇passion嘅工要做一世？

強尼在大學時修讀建築，畢業後順理成章做工程師，專業人士生活穩定。直至強尼踏入30歲之時，開始思考一個問題：「呢份工是否可以繼續做多30年，做到退休？」眼見一齊成長一班兄弟，每圍坐一起討論工作點滴，字裏行間充滿熱情，自己卻沒有那份熱血。強尼把自己的想法放在心裏，直至見到電視台請主持，心想「30歲唔試等幾時？」便寫信應徵。

強尼在誤打誤撞之後成為part time足球節目主持，維持了一年時間，真心鍾意但前路未明：「我想畀自己3年時間，暫時放低工程師工作，唔得，返去做老本行都未遲。」他心想如果3年後可以賺到原本人工的8成，就繼續做下去。3年過後，公司跟他傾續約，人工剛好是他本行的80%，可能世事冥冥中有主宰，令強尼繼續這條足球評述員之路。

最鍾意《全民造星I、IV》欣賞AK份人夠真

做過四屆《全民造星》主持，陳志雲亦問強尼到底喜歡哪一輯，強尼的答案是「造星一」和「造星四」。前者因為是第一次大家也是摸索階段：「總決賽當晚，我見到台下800個fans手持燈牌嗌到聲嘶力歇，雖然人唔算好多，但我感覺似置身K Pop演唱會現場，心入面胸湧澎湃，嗰刻真係好感動。」而「造星四」的誕生就與他個人想法同出一轍：「好多人話成班女仔化妝化好耐、又會好嘈，唔值得做，但我覺得女仔都可以參加造星，女仔除咗選美鬥靚，都可以鍾意唱歌跳舞，點解唔畀機會佢哋？」

《全民造星》4輯最記得AK、Winka

強尼又講到令他最深刻的造星參加者，男的是AK，女的他就選Winka。《全民造星I》參賽者好多人都獨當一面，今時不同往日，但是到了今時今日，AK仍然會主動前來打招呼、主動問候，很能感受到他這份真情、始終如一。

另一位令強尼感到印象深刻的「造星」參加者是《全民造星IV》的Winka，有一次他無意間看到她寫的筆記：「原來Winka幾年來堅持將自己心聲寫成筆記，裏面寫滿鼓勵自己嘅金句好似『金魚不用學跑』，現世代好多人都好驚畀人睇穿，忌諱以真實一面示人，佢呢一面令人不期然想了解佢多啲、保護佢多啲。」分享兩個藝人，兩件小事，令人感受到強尼本身也是性情中人，亦都感覺到他由工程師轉做藝人的決定，是發揮和展現自己感性的一面，也由側面看到他成為藝人的初心。

低調爸爸強尼有個10歲仔仔

訪問當中，強尼保持低調不想談及太太，但面對問題尖銳見稱的陳志雲，他也「交貨」談到兒子。講到10歲兒子他這樣說：「而家呢一代同以前好唔同，呢兩年嘅時間因為疫情關係，好似消失咗一樣，我見仔仔眼界好大，睇緊好多嘢，例如YouTube，我哋以前完全冇機會接觸呢啲嘢，到底佢哋以後會變成點？我都好期待。」

強尼主演的《反起跑線聯盟》將於下星期一首播。在去年2021年，強尼憑主演的ViuTV劇集《暖男爸爸》獲得《第5屆觀眾在民間電視大奬》 民選最佳男配角最後5強，以17票之差（0.1%）敗給憑《男排女將》獲提名的盧瀚霆而屈居亞軍。他在訪問中，在電視劇中做配角好享受演出，感覺零壓力。今次《反起跑線聯盟》擔正做主角，會否為全能藝人強尼添加多一個可能性？星期一劇集開播自有分曉。

強尼噚日於《Stephen．傾》節目大談入行奮鬥史