【i believe you can fly!】空姐有「光環」、人工高?話你知空中服務員的樂與淚!

不論電影或電視,都不時把空中服務員塑造得高尚又優雅,每次出現都彷彿要拉著皮喼說一句「我又飛喇~」!但事實上的飛行生活,可能並沒有大家想得那麼「風光」, 除了身體變差兼受氣,更會遇上不少令人「反眼」的事情。這次找來幾位「行內人」和「過來人」,以第一身告訴大家空中服務員的樂與淚!

疑問1:人工一定高?
Jennifer:「好多人誤以為人工好高,但事實唔係。每間航空公司嘅標準都唔同,即使係同一間航空公司,入職嘅底薪都不停變緊,即使我入行時拎緊某個人工,依家入行嘅人都唔保證份糧係一樣,可能會更低!」

疑問2:內地客一定煩?
Nana:「其實唔關國籍事,好多時係啲客唔明我哋嘅職責。試過有個香港媽媽因為囝囝瞓咗覺,唔肯俾我哋幫小朋友扣安全帶,但基於安全理由小朋友一定要扣,最後媽媽都有大聲鬧同講出『我個BB係我嘅,佢有事我會自己負責』呢種說話 !」Jennifer:「內地客好多時係因為唔識,同佢解釋佢哋會明。反而香港人咩都識,所以好多不同嘅要求!」

疑問3:好高尚?
安德魯:「我第二班operation嘅機就遇到有人嘔,前後位都係,最後咪又係我哋執!另外亦有大學畢業生話自己唔會做洗廁所呢啲嘢,但其實洗廁所都係我哋職責!」Nana:「我覺得做冇所謂嘅光環,因為對我嚟講我份工其實都好辛苦!」

除了分享作為空中服務員的樂與淚,下一集Nana、Jennifer和安德魯更會分享見工tips,以及投身空中服務員這個行業需要注意的地方,想入行的朋友記得留意!

advertisement
Something is wrong.
Instagram token error.