新功能試玩!編輯實測大熱修圖app,一鍵即變漫畫人物!

幾乎每個女仔都鍾意,就算唔「P」瘦自己,都會用app調吓色!最近大熱app出咗新功能,只要㩒個制,就可以張你個樣變成漫畫人物。唔少台灣「網紅」都已經率先試玩,想知效果係點?就等編輯即刻示範一下!

大家可以先打開美圖app的主頁,按進「繪畫機械人」,然後可以即刻影相或者從相薄中揀出自己嘅相。之後app就會自動將照片漫畫化,而且兩款唔同嘅畫風中,共提供了約15款背景圖案任揀,絕對可以「畫出」最有feel嘅人像,大家不妨試玩吓!

試玩感:

今次嘅功能操作上好簡單,只係需要㩒一個制已經搞掂!不過畫風方面,「Garden」嘅感覺比較夢幻,出來效果亦相對較靚,個人比較喜歡。至於「Dream」反而冇咁夢幻,畫風線條偏實,寫實感較重之餘,仲有啲「P過頭」嘅感覺!
想睇更多試玩效果,可以喺Instagram打#繪畫機械人,就會搵到好多用家嘅相啦!快啲試吓啦!

圖片來源:Instagram@ xxzyxxzy