advertisement

唉,估唔到2017年開始左28日嘅文章已經要用「唉」作開頭,全因為新年必定會同唐三藏取西經一樣,一定會經歷三姑六婆嘅七七四十九問,令大家痛不欲生,甚至會萌生出就算機票幾貴都好,都想即刻訂機票就離開香港避年嘅念頭。

 

 

可惜事願與違,你肯比錢都大把人一早有你呢種諗法,機票一早一掃而空,而你只好乖乖同屋企人去面對果七七四十九問。

 

呢幾日上網已經睇唔少文章同埋插圖,由此可見睇嚟大家已經有多年經驗,每年都會遇到三姑六婆嘅無間斷旋風式發問,雖然有一大部份人表示早已盲目,聽到都當耳邊風,煠熟狗頭咁回應佢「係呀係呀」,但係都仍然有一大班人唔識回應,只有十分老尬咁細細聲回應「係呀,仲未搵到合適嘅對象」,有時候我企喺隔離聽到都覺尷尬,但查實,單身又有咩問題呢?點解你地講到好似單身就係罪,有有錯?

 

通常三姑六婆問完「你男朋友呢?」,如果你答無就中計啦,因為佢地會好似玩格鬥game咁駁住combo問多你一句「哎呀,都咁大個仲未搵到男朋友呀?」

 

三姑六婆咁講嘢真係好絕呀!但老老實實,我享受單身唔可以?新年親戚聚會,成日都會唔見表兄弟姐妹,往往一問就原來去左岳父母度,次次三姑老婆講完都會黑面,至少我阿爸阿媽唔洗因為呢樣嘢而唔開心,另外,我見到阿表哥表姐個仔女,即係我表外甥啦(好似係),失哂控咁又跑又跳又喊又盛,我其實某程度都幾慶幸我今年仲係單身,唔係話結婚同埋生小朋友唔好,但係我真係比較享受一支公,至少唔洗比三姑老婆問我點樣教個小朋友唔好擒檯擒櫃,大吵大鬧。

 

三姑六婆,其實我真係好感激你年年都咁關心我,但都問左咁多年,你唔悶我都悶,不如掉返轉,如果我真係拍拖就同你講好唔好?唔好再追問我啦,我唔想新年流流都要黑你面呀,好無?

 

單身不是罪呀,唔好因為單身就好似做錯事,唔敢面對親戚啦,你無做錯架,緣份嘅嘢邊個話得埋呀。

 

新年快樂啦!

 

FB / IG. promiseof8