你偷食咪偷食囉,扮咩野啫?

有好多人又唔認,比人捉到又扮哂係真愛借機會分手,
更甚嘅直情扮哂情聖咁款話「我都控制唔到」,真係好噁心。
你同一個人拍咗拖好多年,悶啦,厭啦,之後出軌去搵第二個,
大家明,人之常情,總有人鍾意試新野,咁不如你直接分手啦,
一開始又做咩要拍拖?要同人地一齊?不如一開始就做無腳既雀仔啦?
好啦,係要等到比人識穿你,先肯講出口,不過佢地永遠唔會乖乖講分手,而係總要扮到好委屈好似佢先係受害者咁,唔知仲以為佢比人拎住枝槍指住佢個頭迫佢,佢地往往都理直氣狀話「我都唔想架!」,攪笑,唔想你又去做?
講完一大輪,終於話分手啦,但係又要拎返個尾彩,明明你就係你錯,但係講到自己大聖人咁,「我諗我地其實一早已經唔適合,所以都係分手」,扮咩呀,明明就係你在先,呢個時候又講咩唔適合呀?你不如坦白講因為你鍾意左第二個,貪新忘舊所以要分手啦。
其實真係有時候真係好慘,落力為你好,得不到分數,一開始你無人無物我都咁愛你,陪左你咁多年,但當你稍有成就,有返自信就離我而去,你永遠唔記得係你人生低谷果陣時係邊個拉你一把,你眼裡面只有你依家既成就,同埋你覺得自己應該可以享有更好既一切,包括伴侶。你呢種人真係好自私,只係諗自己,永遠唔會考慮人地感受同埋諗過要回報對你好既人。
你唔好搵十萬個藉口話我唔明又或者話呢個世界係咁架啦,Sorry,真係唔係咁,唔好將你扭曲既價值觀套用係正常人身上,你要鍾意第二個,唔該你直接講,唔好係到假仁假義,呢樣果樣咁,最後一次交談,唔該你比返少少作為男人既骨氣比我睇好嗎?
我唔想將來同人地講返起你,對你既印象只有廢柴同渣男兩種感覺,
話哂你都係我個前度,唔該你啦,你囉,扮咩野啫?
不如之前直接同我分手先啦,好無?
Tumblr : promiseof8.tumblr.com
Instagram : promiseof8