發姣也請慎選對象 – 覆Beatrice


圖片來源:互聯網
Hi 貽興︰

你好。一向都好欣賞你既文筆同風格,對事情分析得好透切(徹)而且永遠一針見血,有種「好辣」嘅感覺。近來有一件事困擾得我好緊要,希望你可以幫我分析一下。

我係一間公司做左差唔多三個月就辭咗職。A 同我唔同部門但日日都朝見口晚見面,佢嘅職位比我低但唔算係我下屬。佢係一個結婚差唔多有一年嘅中年男人,份人成日講笑仲時不時會講衰野。聽人地講佢未結婚之前,雖然自己有女朋友,但都好鐘意同人搞氹女仔,但結咗婚之後就收斂晒。

初初我唔知佢d 歷史,淨係覺得佢好似個大哥哥咁(我初時唔知佢結咗婚,因為佢冇戴戒指,但其實全公司都知佢已婚嘅),所以我成日黐住佢揾佢傾偈。講真佢對我真係冇嘅行動,我覺得佢好刻意保持距離添 (唔知係我自己敏感定係點)。有次佢講笑咁問我要唔要佢電話號碼,我話好,但佢又藉故講d第二d野,唔肯比佢電話號碼我,佢亦都故意唔問我拎電話號碼。我心諗其實電話號碼好閒啫,我十個同事九個都有,洗唔洗咁?其實我同個個男同事都好多嘢傾,唔係淨係同佢。

而且佢好奇怪嘅,離遠就成日望住我,但同我講緊嘢/近距離嗰陣,就好似好唔想望到我咁,永遠望住第二度,就算望住我對眼都好快閃開。但你話佢討厭我,又好似唔係,佢都周不時會同我講笑講下衰嘢咁(但佢對個個都係咁講笑講衰嘢)。總括嚟講,從佢嘅行為睇,佢對我係完全冇野,但我直覺上卻覺得佢對我有d 野。

到我遲(辭)職,佢知道咗都冇咩反應咁。但到咗last day 嗰日,我臨走嘅時候佢就走過嚟要同我握手。我地握住大家隻手好一段時間都冇放開,之後佢突然間攤開雙手(即係要擁抱嗰種姿勢),講咗句「嚟啦」。我嗰下呆咗幾秒(因為我覺得同佢嘅關係未熟到可以用擁抱嚟道別),佢又再講咗句「嚟吖」。

我始終企硬唔肯就範,始終去攬一個有婦之夫實在有違我嘅原則。佢見我唔肯,佢就掉頭走,咁我見佢走我又跟住佢走,跟住佢都重係唔放棄,再話「嚟啦」咁。我跟住同佢講,我係唔會攬有婦之夫。之後我離開咗公司,msg 佢,佢嘅回復比我嘅感覺係唔想再同我講野咁。

其實點解佢會想攬我?我唔肯,點解佢要咁堅持,好似一定要我比佢攬咁?

自問平時都好檢點,同男同事唔會有身體上嘅接觸,佢亦知道我係一個好純嘅女仔。我同個長輩傾過,長輩一口咬定佢係衰人,話如果嗰下我比佢攬,就會有下文。比佢攬即係承認咗鍾意佢,咁佢就會去馬同我發展

貽興,其實你嘅睇法係點?我自己覺得佢唔係壞人,你認唔認同我長輩講嘅野?定係我比佢嘅感覺唔檢點,所以佢先會咁?定係其實我諗多咗?

Beatrice

Hi  Beatrice︰

佢又唔係你老豆,你又唔係佢條女,嚟咩?問心,一個麻甩佬係咁叫你嚟啦嚟啦,嚟咩春?

姑勿論佢係咪有心同你,但有意抽水就唔洗多講。明知你要辭職,冇機會再見,拖手唔夠,攬一下都好吖,至少扮咗咁耐正人君子,覺得蝕咗焯,知你要走,咪攬番夠本囉,反正有人講咩佢又可以大條道理扮係送別goodbye hug,進可攻退可守,呢啲咁識避忌同放線嘅情場老手,算吧啦,你呢啲單純嘅羊牯係冇可能夠佢玩架啦,嚟兩個殺一雙啦佢。

就係因為知道你純,唔識將身心分開,身動就心動,攬咗之後你一定心如鹿撞,為留伏線,佢點都要令你之後忍唔住繼續搵佢,所以先至一再引你入局。明未?

唔好相信一個婚前鍾意搞四圍撩女嘅男人婚後會有本質上嘅改變。靜極思動,潛伏一段時間,佢就會故態復萌,分別只係婚後唔再可以明刀明槍,所以先要用咁隱晦方法覓食,睇啱獵物,再引到僻靜地方落手,食完唔吐骨,你蝕底冇人知,真正死咗都唔知咩事。

純品唔係壞事,但遇著壞人就大件事。成件事睇你可以用「發姣」二字講完。發姣冇問題,正常求偶反應啫,但從你咁寂寞咁易畀人攻陷嚟睇,唔該你一係醒少少,好好學識保護自己;一係就揀個值得一啲嘅男人,先將自己交出去,如嗰唔係,以你對壞男人嘅認識程度,真係死十次都嫌少。

唔好以為長輩思想一定老土過時,佢見嘅人多過你,佢食鹽多過你食仔,多啲聽吓長輩意見,唔好懶醒,你會受少好多不必要嘅傷。

祝  多聽長輩話

貽興