選擇如意郎君好正常 – 覆單親媽媽

你好,有一個問題困擾左我好耐好耐,我真係唔知點解決,所以決定sand email 俾你。

我係一位單親媽咪,一個女人抽(湊)住一個6 歲大嘅女女,壓力好大,所以一直好想重新組織一個安定嘅家庭。

我有一位男友,拍拖都有一年幾啦。距(佢)比我細兩歲,做金融嘅。距(佢)好錫我,我想要咩只要距(佢)負擔得到都會滿足我,亦都好錫我女女,表面上大家 都覺得我揀距(佢)做老公係唔錯嘅。

但實際上,距(佢)做金融收入好唔穩定,今日多,聽日少,或者分分鐘穩(搵)唔到客可能連收入都無。加上距(佢)屋企一家五口住一間好細嘅公屋,距(佢)同兩個細佬瞓一間房,宜家樓價又貴,如果我哋結婚都唔知住邊。

另外喺半年前,我認識一位男性C,距(佢)都係比我細。距(佢)剛讀完中醫碩士,準備去政府醫院做醫生,而且距(佢)屋企係做水果批發,屬於中產家庭。

我偷偷同C 拍拖,C 同樣對我好好,距(佢)知我情況,唔介意我有個女,亦都好中(鍾)意我,距(佢)話如果我願意,距(佢)可以同我結婚。加上距(佢)好中(鍾)意小朋友,又係醫生,同距(佢)一齊我感覺到未來。

但係我男友對好真係好好,我感激距(佢)。我男友經常問我幾時同距(佢)結婚,但係我話儲到首期買樓先啦,因為我想要一個家,所以我一次又一次將距(佢)嘅好意拒絕。

我真係好煩,唔知點算好,老實講,人係現實嘅, 我覺得同C未來會穩定D。但係我男友又對我好好,我哋又有感情,我真係唔知點揀,因為我只(知)一腳踏兩船唔會維持得好耐。
 
單親媽媽

單親媽媽︰

我相信,大部份女性都會揀 C 。

基本上,兩個男人都疼你、體諒你的處境,但 C 明顯就是有前途。

如果你揀 C ,無人會話你貪慕虛榮,只會覺得你的選擇好正常。

表面上,原本的男朋友已經不錯,但是,貧窮所帶來的恐怖,你只是暫時未經歷到。此刻,他還撐得住,所以無影響大家的感情,但一旦他到了非常窮的地步,他只會如同其他窮男人那樣,以窮為藉口去放棄你。

我不看好你與原本的男朋友,我認為你們遲早都會散。

新出現的 C ,是如意郎君呀,你和你女兒的前途,跟著他,有點保障。

如果,你本身賺能力高,那麼,你繼續與原本的男朋友一起,就無問題。一對愛侶,誰賺得多,就誰去付出多些,這是 OK 的。可是,你也賺得不多吧!於是,你根本解決不到原本男朋友的銀問題,你和他一起,他幫不到你,你又幫不到他。

要與一個好愛自己的男人說分手,是一件痛心的事。但整件事,都不過是對自己好、對女兒好。

其實,你在心裡都覺得 C 才是如意郎君吧!只不過,你做不了壞人,對原本的男朋友說不出分手。

拿勇氣出來,為自己的愛情前途搏一舖。