為你分析完畢又如何? – 覆煩惱的人

Zita︰

你好,我覺得你好叻,可以理性果斷去分析男女之間感情。

有件事我煩足一年,就是公司有個細我4 年的男仔追求我,今個情人節也有約我出去。他有(以)下優點缺點,令我很矛盾,不知道比唔比機會佢好。

一.    習慣說慌

舉例小部分︰公司女同事(大佢十幾年)話佢私下有同佢whatsapp,我之後問返佢,佢話冇同佢whatsapp,到我再問深入點,佢先話間中有。有時連問(佢)去旅行有冇買手信比自己都要答有,之後我隔多排再問,佢竟然話冇。

私下同我講有參加攝影學會,但我有次介紹佢比朋友識,人哋問佢有冇參加攝影學會,佢好肯定咁話冇。

未追我前,喺公司扮有女友,之後開始追求我,先認之前講大話。

二.    對我疏爽細心

好中(鍾)意成日買嘢比我,幾十至千幾都有,佢見我有需要的,我唔使出聲佢都會主動買,食晚飯也平均一千。(一年來我只同佢食過三次晚飯,因為約會中覺得佢大男人,我頂唔順,所以次數唔多。)

三.    

佢今年29,佢話未拍過拖,亦好少問我私人嘢,我估佢以為我二十零歲,實際大佢4年,至今也不知道。

四.    有交帶

佢放假會自動報行蹤的。

請問這個男仔值得同佢開始不?很矛盾,請給我意見,謝謝你!

煩惱的人

煩惱的人︰

他最明顯的缺點是講大話。大概已經成為個人特色。
 
但我認為,你很快就能拆解他甚麼時候講真、甚麼時候講假。只要你看得穿拆得到,他愛講大話,於你來說無大問題。
 
當然,前題是,你要有接受「大話精」的能力。
 
第二個麻煩是,你比他大四年,姊弟戀這回事,其實已經無問題。不過,有些男人的確會在開始時有點介意,但其實,不過是心理關口。你只要表現得健康有活力有情趣,你大過他、又或是他大過你,都不構成問題。
 
至於優點嘛,他頗討人歡喜。他對你在錢銀上慷慨是非常大的優點。你明白嗎?在錢銀上樂意付出的男人,通常在感情上都同樣樂意付出。喜歡對你付出,好棒啊!
 
有交帶當然亦一流,他喜歡向你報告生活上的大小事,這種男人可愛極了。這亦代表,他好喜愛與你作出分享。
 
而我覺得非常讚的是,他對你主動。主動約你,主動買小禮物給你,會主動追女仔的男人,買少見少了。許多男人要女人反過去追求他,真無癮。
 
我認為,與他拍拖,應該會幾開心,起碼,他愛付出,也愛報告和分享。這個男人,絕對可以考慮。
 
不過,最緊要的是,你對他有冇 feel ?你要寫信來問我,是否對他根本無特別感覺?
 
愛情感覺這回事,無人幫到你,喜歡就喜歡,不喜歡就不喜歡。
 
又抑或,你覺得他不夠好?你心目中的男朋友,有你定下的標準。
 
而你要預料的是,皆因大家是同事,要是有天分手,你能處理得到嗎?
 
旁人為你分析了一大堆,最後,拍不拍拖,只看你。