他不會介意自己的不合格 – 覆Alice

謝謝你花時間解答我上次的問題!

同男朋友分開咗一星期,呢段期間佢無主動聯絡過我,只係得閒就覆吓whatsapp。直到佢放假前一晚就同我講第二日約咗朋友,要早瞓,明天先再搵我。我當時覺得奇怪,佢從未試過放假前一晚唔打機,十二點幾就瞓,不過既然佢咁講,只好信佢。

到第二日下午佢爸爸whatsapp問我,知唔知佢琴晚去咗邊,到早上七點都未返,我只好答唔知,可能佢又去咗玩啦!

咁我就即刻同返佢講,佢就話去咗朋友屋企,唉,我當然唔信啦,咁都要呃,之後講一大輪,佢話我同佢一齊只會令到自己唔開心,我問其實你係咪想?佢又答唔係,但我都選擇同佢和好。

兩星期後,佢電話成日有同一個號碼打嚟佢係唔會接,我趁佢瞓緊打返去,結果係個女仔聽,好奇之下我睇返佢冇返屋企嗰晚嘅電話紀錄,都係同個女仔聯絡,仲有個「3」字頭嘅電話號碼,我上網一搜尋之後發現係時鍾(鐘)酒店。

質問佢,佢當然又係講大話,推落佢朋友到,我笑而不語,繼續扮無嘢同佢一齊。

前幾晚佢瞓咗,見到佢電話有個信息係嗰個女仔send嚟,內容係「你想點,可唔可以講俾我知?」

我就覆「?咩點」。

個女仔就話「你話唔係唔要我,但又唔搵我,係咪?」

我睇到呢句即刻整醒我男朋友,叫佢當我面打返去講清楚,點知佢講咩已經無再同佢聯絡,想繼續瞓覺,我嬲到企喺到喊,佢見到先send返個信息俾個女仔,話佢已經有女朋友,唔好再打俾佢。

諗返起覺得自己好蠢好傻,竟然俾咗個機會佢出軌,表面我原諒咗佢,但心裡條刺就一直都在。

,你覺得我原諒佢繼續一齊呢個決定啱嗎?

Alice

Alice︰

你很清楚你目前的狀況吧!你是正印女朋友,而你的男朋友會出軌。
 
看他的態度,他非常賴皮,完全就是「你忍就留低,不想忍就走」。
 
就是有這種男人,自然自在地做衰人,無太多罪惡感,自我中心極強,對身邊人不志在,有又得無又得。
 
他明白你會傷心失望,但你的傷心失望不能打動他。
 
其實,被他傷害的女人何止你一個?那個都好慘。
 
他喜歡你才留你在身邊做正印女朋友。但問題是,他不會對女朋友很好,輕視忠誠專一,也未必懂得去愛一個人。
 
他在你面前主動 send 訊息給,等於給足你面子,以及重視你。可是,作為一個男朋友,依然不合格。
 
講真,你有幾痛苦幾開心,只有你自己知。一個會出軌、不合格的男朋友,你還想繼續要嗎?
 
最特別的是,他根本不會介意自己是個不合格的男朋友,他好自我啊,你接受就接受,不接受就拉倒。
 
我的建議是,你暫時繼續與他在一起,看看關係有否提升的可能。你愛他,要你即時走,你未必走得到。
 
如果,他繼續出軌,那麼,你就問自己,何時才肯死心、肯走。
 
其實,你是這段關係的決策人。他不會趕你走,只看你自己是否想走。
 
重點是,他不介意自己不合格,但你介意嗎?
 
到你懂得介意之時,你就走啦!