拍到第三集，成個紐約自然博物館嘅動物都出過場，觀眾唔嫌悶都怕編劇冇橋。今集原班人馬跑去大英博物館，集中火力講塊令展品復活的石碑，用「放手」包起主角Larry（Ben Stiller飾）兩條線——仔仔長大同展品要「死去」，竟然呼應番Larry第一集離婚轉工的人生轉捩點，少有冇爛尾的喜劇系列。
因為埃及石碑先可以翻生嘅展品，今集冇咁搞笑，但就勝在有親切感。例如塊石碑生綉，令馬騮仔暈低，Larry就係咁叫佢打自己一巴，冇睇過前兩集就未必識笑。但因為劇情講大家要去大英博物館搵法老，幫手搞掂塊碑，所以有騎士、法老王等新角色，都算有新鮮感。特別當佢地要穿過大小展館時，好似帶觀眾環遊世界，參觀世界文化。
今次編劇聰明地扭橋令觀眾會心微笑，例如騎士話Larry似冷面小丑，全程不斷嘲笑佢，玩番Ben Stiller嘅喜劇演員身份。至於狼人Hugh Jackman做戲中戲，客串舞台劇演員一場戲，簡直係神來之筆，講騎士（Dan Stevens）以為自己係真人，但突然發現自己只係一個蠟像，甚至只係神話人物，連歷史都說不上，將「展品其實並非真實」呢個看似複雜嘅探討，用胡鬧劇情輕鬆帶出，亦鋪排出之後，展品要「死亡」，即係冇得每晚翻生嘅結局。
今集仔仔唔想升大學，Larry怪獸家長上身，本來以為係硬加親情線，原來係借兒子Nick（Skyler Gisondo）成長出去闖，將Larry的爸爸身份同博物館守衛重疊－－仔仔同展品都唔係屬於佢嘅物品，唯有放手比佢地去做應做嘅野，亦呼應電影開頭，考古學家掘法老王墓的「詛咒」：一切都會完結。所以展品繼續做死物，仔仔就追尋夢想去做DJ，Larry亦重新出發轉工。導演Shawn Levy拍足三集，冇胡鬧亂黎之餘，反而拍出中年男人無奈苦澀。
除咗有Hugh Jackman客串，仲有啱啱過世嘅金像獎演員Robin Williams的最後演出，相信有睇開《翻生侏羅館》嘅觀眾，一定記得羅斯福總統。今集佢亦係最尾一個變回蠟像嘅展品，未知係咪專登剪接到咁，但都算係一個溫暖的小細節。
