advertisement
《戰逆豪情》有大量戰爭場面加人性掙扎，五個男人嘅兄弟情，基本上已穩陣好睇。
二戰期間，美軍深入德國敵陣。最強坦克小隊由隊長Wardaddy（Brad Pitt飾）帶住出生入死，軍人對無情戰爭有最深體會－－為咩殺人？點樣說服自己？
由新丁Norman（Logan Lerman飾）加入小隊嘅眼光，觀察戰場殘忍又血腥真面目。一幕幕屍體、內臟近鏡，軍隊好似堆填咁處理同袍遺體，成功引導觀眾一開始就對戰爭本質感到反胃。即使有Brad Pitt型到震演出，觀眾都只會同Norman一樣不斷質問資深隊員：「點解我無啦啦俾人送入黎殺人？我頂唔順啦，你殺咗我都唔好叫我殺人。」
有一半時間都拍攝於坦克內部，五位成員對戰爭、死亡嘅恐懼，於密閉空間更顯張力。全片灰暗色調加強無奈要打仗，驚都冇用唯有頂硬上嘅心理陰影。逐步勾劃每位成員說服自己殺人嘅思維，係全片最有趣地方。虔誠教徒Bible（Shia LaBeouf）日夜唱聖詩，相信自己蒙主召喚上戰場；Gordo（Michael Peña）同Coon-Ass（Jon Bernthal）就靠酒色麻醉自己；大佬Wardaddy簡單直接，你對敵人仁慈即係對自己殘忍，留番條命等場仗完。
Norman同觀眾一樣獵奇式了解戰場邏輯，一齊踏上理解同體諒戰爭殺人罪行。一場午餐戲中，小隊悲涼地重提嚇人經歷，令電影從質問殺人道理何在，轉為歌頌軍人間熱血豪情。亦為之後坦克陷入絕境，唯有大開殺戒作鋪排。
五位軍人最後身陷險境，由心軟到變成「戰爭機器」的Norman都隨著眾大叫「The best job I’ve ever had」，在別無選擇嘅坦克入面準備作戰，無奈又諷刺咁將戰爭當作工作。片中穿插好多人性小光輝，突顯「戰爭殺人」矛盾，但呢份人性在大型戰爭中，究竟有咩位置？
