【純粹講戲】《黃飛鴻之英雄有夢》:彭于晏之英雄有肉

以前拍黃飛鴻,講的是中國人抵抗西方入侵,又或者反擊腐敗官府、地方惡霸。今次導演周顯揚加編劇杜緻朗想拍少年黃飛鴻的「夢想」,野心不少。畢竟黃飛鴻一直是背負國家民族使命,用「夢想」容易顯得小氣。結果,彭于晏肌肉發達夠勇武,但個「夢」只靠熱血對白堆砌,所有鋪排都似係比彭于晏show off多於真正想講夢想。

睇呢套戲全程都起住雞皮。開場飾演黃飛鴻嘅彭于晏,「鍊」起把聲用國語讀一大段旁白,嘗試向觀眾解釋清朝末期廣州有幾黑暗,完全係放棄使用其他角色、畫面同場景交代電影背景,只用主角把口講晒出黎,咁我做乜要睇畫面呢?再來,黃飛鴻同好兄弟赤火(井柏然飾)全程不斷--真係冇比機會觀眾抖下--講好多極之露骨、肉麻的追夢對白,例如「我的命就是你的命」、「我不能死,因為我打不死」……OK……睇到後面,就知點解要畫公仔畫出腸。

因為呢套戲其實係「彭于晏之英雄有夢」,唔關黃飛鴻事(因為主角叫「阿飛」,全套戲都冇出過黃飛鴻呢三隻字),除左佢地阿爹都係醫師、身邊有個牙擦蘇,又咁啱識武功之外。

基本上成套戲就係有個叫黃飛鴻的人,無論係唔係我地本身識果個都好,佢話我地知佢由細到大都見盡社會醜惡,所以要抱打不平。做卧底、智取設局陷害壞人……呢套戲所有野都係為咗比彭于晏露肉的--唔係著背心就係比人割爛長袍,然後係咁打,再慢鏡睇住肌肉點震。點解對白咁熱血用露骨?因為要留番鏡頭比佢打同露肉,唔可以浪費時間鋪排劇情,更加唔好㗰氣講下其他角色,甚至背景社會環境。

所以入場可以放鬆心情,專心睇武打場面,以及彭于晏胸肌,其他唔好太執著。黃飛鴻明明話打倒黑虎幫唔夠,因為其他惡勢力仍然存在,但去到後尾打完大佬,就冇左件事咁。仲有最尾點解要去官府擊鼓鳴冤?唔係話當時政府無能咩?

不過搵王祖藍做牙擦蘇確實有驚喜,佢收起電視劇的浮誇演技,個衰衰格格笑容又真係好到位。完場更加可以聽五月天唱主題曲,就真係熱血!