【純粹講戲】《柏靈頓》:用童話融化種族歧視

聖誕檔期的卡通片離不開賣溫情或搞笑,等家長同小朋友過個溫馨聖誕。《柏靈頓》就成功用家傳戶曉的英國熊仔,將沉重的種族歧視,用輕鬆但感人的故事處理,細節中的笑料亦令大人觀眾看得過癮。

故事用柏靈頓要搵一個「家」串連,由森林跑到倫敦,撞板笑料當然大把,但笑英國天氣同當地拘謹的人際關係,就充滿subtle幽默感。暫時收留熊仔的一家人,角色設定得相當有趣,神神化化藝術家媽咪搭悶蛋老豆,加怕冇面家姐同天真細佬,家人對收留柏靈頓的想法衝突,誇張但真實。最後揭開爸爸的瘋狂過去,再用柏靈頓激發佢嘅冒險精神,完全係合家歡的溫馨結局。
 
但英國童話唔止開心溫情,借古董老闆的童年同移民身份,低調地講出猶太人受納粹迫害,移民歐洲的歷史。被有心人救出,搭火車離開家鄉的故事,叫人想起《舒特拉的名單》,仲乘機同熊仔千里迢迢去倫敦暗暗呼應--移民適應異地文化,尋找「家」,從來是心而非身的問題。

最初搵到柏靈頓的探險家,更因為拒絕將稀有熊人當作野獸,製成標本而被排斥。一批上流精英大聲質問「佢地識打木球、飲茶咩?」,不屑其他文化。童話一樣可以將納粹或歧視種族講得入肉。

大壞人Nicole Kidman一樣有驚喜,扮前夫Tom Cruise響《Mission Impossible》倒吊偷野,真係非常過癮。雖然都係誇張卡通式演繹,但成功令全場小朋友尖叫連連,仲令人聯想起《101斑點狗》的壞女人Cruella。結局同柏靈頓加主角一家對質,「佢同你地唔同類架!」一句將種族問題挑明,感人大團圓結局之餘,又將倫敦的多種族共融帶出,拍出童話的深刻一面,絕對感動。