【純粹講戲】《分手100次》:分手博覽會

成熟港女加貪玩kidult,三日一嗌交,七日一分手,但始終打風都打唔甩,因為森(鄭伊健飾)總會認低威。小倆口決定開cafe唔再亂分手,但一盤順利的生意反成眾人愛情的照妖鏡。鄭丹瑞久休復出執導,搵周秀娜搭鄭伊健,加上星光熠熠客串演員,有如踏入一個愛情展覽,分手一百次,不一定是一對情侶分手100次,也是一百對情侶分手的故事。

戲中cafe設「分手迷你倉」展覽紀念愛情的禮物:毛公仔、戒指……再由鄭伊健寫上段段金句,成個格仔櫃根本就係Facebook、Instagram:影住杯咖啡加網上流傳愛情金句!但這些似層層的金句講唔出什麼大道理,只有各自領悟,各自修行。所以戲中有因而復合的內地情侶,也有沉迷痛苦「我想要好苦、好match我心情的分手咖啡呀」的(偽)印度情人,憑弔愛情的方式是公開傷口,互相憐憫inspire,但唔包好番。

用cafe作為展示愛情的舞台很聰明,咖啡店是眾人社交場合,瑞記(王菀之飾)及萊萊(溫心飾)都讓大家看到幸福的一面,結果卻是我睇你好的Facebook典型生態;咖啡店也是男女主角私人愛情地帶,嗌交好定幫客落單先好,充分帶出兩人公私不分撈埋一堆的關係,也是後段兩人衝突升溫的重要場景。

愛情唔關輸贏事,但兩人角力始終冇得避。女主角終於得到「成熟」男友,反而唔識面對,唯有放低舊事重新追上。開放式結局雖然有點怪,但後段營造「唔知點愛落去」的苦苦掙扎卻非常揪心。