【純粹講戲】戰神 : 海格力斯:製造英雄攻略

近排英雄電影掀起「去神化」熱潮,希臘神話大力英雄海格力斯(Hercules)作為宙斯同凡人私生子,半人神身份當然是好題材,由兩位導演分別開拍。這套由拍過《火拼時速》、《變種特攻:兩極爭霸》的Brett Ratner,重撰希臘神話英雄對抗命運的傳說:英雄唔一定流住神的血,靠teamwork甚至信念都可以成功。
 
《蠍子王》狄維莊遜(Dwayne Johnson)爆肌肉為國王完成一統大業,關鍵並不在於眾神,而是一個「公關團隊」,有出口的講故佬及軍師預言家,負責吹噓海格力斯的神力,作為宙斯之子有幾勁;出力的勇士負責幫手打,然後歸功海格力斯。而主角,只係一個收錢等收山的殺手。

電影中段已為觀眾打破所有神奇傳說,一拳打死對手都係靠暗器而非神力。但故事中愈吹愈大的神話,令大力士被迫孭起成個王國的成敗。「懷疑自己」是英雄誕生的重要條件,由打仗生死未卜,到疑似親手殺全家陰影,海格力斯傳說同佢本人愈來愈遠,帶來更深的身份危機。

戰友預言家Amphiaraus同埋永遠活在陰影中嘅Tydeus,前者從容擁抱死亡,後者是受恐懼支配的野獸,剛好反映海格力斯的可能結局。當然凡人要選擇面對恐懼,發現自我,先可以成為英雄。最終「英雄」都要企晌神殿中受膜拜,永遠走唔出被神化的結局,因為邊個唔想要救世主幫我地解決所有問題,乾手淨腳呢?